ދިއްދޫ ފަރަށް އުރުނު ބާޖުގެ ވެރިފަރާތް 100 މިލިއަން ރުފިޔާއިން ޖޫރިމަނާކޮށްފި
މިދިޔަ މެއި މަހު ހއ. ދިއްދޫ ފަރަށް އިންޑިއާގެ އެމްއެމް އެކްސްޕޯޓުގެ ބާޖަކާއި ޓަގެއް އުރި އެ ފަރުގެ މާހައުލަށް ލިބުނު ގެއްލުމުގެ ބަދަލު ހޯދުމަށް އެ އުޅަނދުތަކުގެ ވެރިފަރާތް ކަމަށްވާ އެޗުއާރުއެސް އިންފްރާޓެކް ކުންފުނި 100 މިލިއަން ރުފިޔާއިން ޖޫރިމަނާކޮށްފި އެވެ.
ވީ ކިހިނެއް؟ – އެޗުއާރުއެސް އިންފްރާޓެކްގެ ‘ޓީބީ މޫތާ ޕްރިންސެސް’ ޓަގު ބޯޓާއި ‘މޫތާ ޕްރައިޑް’ ބާޖު ދިއްދޫ ފަރަށް އުރުނީ 2 މެއިގަ އެވެ. އެއީ އެ ރަށުގެ ބަނދަރު ހަދަން ބޭނުންވާ ބޮޑު ހިލަ ބަރުކޮށްގެންދިޔަ ބާޖެކެވެ.
އެ ހާދިސާ ހިނގިތާ އެއް ދުވަސް ފަހުން ބާޖު ފުންކުރެވުނު ނަމަވެސް، ޓަގު ބޯޓު ފުންކުރެވުނީ އޭގެ ހަތަރު ދުވަސް ފަހުންނެވެ.
- އިތުރަށް ކިޔާލަން – ދިއްދޫ ފަރަށް އުރުނު ޓަގު 4 ދުވަސް ފަހުން ފުންކޮށްފި
ތަފްސީލު – އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އިން މިއަދު ނެރުނު ބަޔާނެއްގައި ބުނީ، އެ ހާދިސާގައި ދިއްދޫ ފަރަށް ލިބުނު ގެއްލުމުގެ ބަދަލުގެ ގޮތުގައި އެޗުއާރުއެސް އިންފްރާޓެކް 100 މިލިއަން ރުފިޔާއިން ޖޫރިމަނާކޮށްފައިވާ ކަމަށެވެ.
އެ ފައިސާ 30 ދުވަހުގެ ތެރޭގައި ދެއްކުމަށް އީޕީއޭއިން މިއަދު އެ ކުންފުންޏަށް ވަނީ އަންގާފަ އެވެ.
‘ފަރުގެ 4،000 އަކަމީޓަރަށް ވުރެ ބޮޑު ސަރަހައްދަކަށް ގެއްލުންވި’
އީޕީއޭއިން ބުނި ގޮތުގައި، އެ އުޅަނދުތައް ފުންކޮށް ނިމުމުން، އެ ސަރަހައްދުގެ ތިމާވެއްޓަށް ލިބުނު ގެއްލުންތައް ބެލުމަށް 12 މެއިގައި އެ ސަރަހައްދަށް ގޮސް، އުޅަނދުތަކުގެ ވެރިފަރާތުގެ ސާވޭޔާއަކާ އެކު ދިރާސާކުރި ކަމަށެވެ.
“މި ގޮތުން ބެލި ބެލުމުން، އެ ފަރުގެ 4،038 އަކަމީޓަރުގެ ސަރަހައްދަކަށް ބޮޑެތި ގެއްލުންތަކެއް ލިބިފައިވާކަން ވަނީ ފާހަގަކުރެވިފަ އެވެ،” އީޕީއޭގެ ބަޔާނުގައިވެ އެވެ.
ތިމާވެށްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލުހޯދުމުގެ ގަވާއިދުގެ ދަށުން ތިމާވެއްޓަށް ލިބުނު ގެއްލުންތައް ބަލައި ވަޒަންކޮށް ކަނޑައެޅި ޖޫރިމަނާ އާއި ބަދަލުގެ އަދަދު، އީޕީއޭއިން ބުނީ 101.7 މިލިއަނަށް އަރާ ކަމަށެވެ.
“ނަމަވެސް، ގާނޫނު ނަންބަރު 4/93 (ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނު)ގެ ދަށުން ޖޫރިމަނާގެ ގޮތުގައި ކަނޑައެޅެން އޮންނަ އެންމެ ބޮޑު އަދަދަކީ 100 މިލިއަން ރުފިޔާ ކަމުގައިވާތީވެ، 100 މިލިއަން ރުފިޔާ ޖޫރިމަނާގެ ގޮތުގައި 30 ދުވަހުގެ ތެރޭގައި މި އެޖެންސީއަށް ދައްކައި ހަލާސްކުރަން އަންގާފައިވާނެ އެވެ،” އެ ބަޔާނުގައިވެ އެވެ.
އޭގެ އިތުރުން، ބާޖު ފަރަށް އަރައިގެން ލިބުނު ގެއްލުމުގެ ބަދަލު ޝަރީއަތް މެދުވެރިކޮށް ހޯދުމުގެ މަސައްކަތް އެޓާނީ ޖެނެރަލްގެ އޮފީހާ އެކުގައި ފެށުމަށް ކުރަން ޖެހޭ ކަންތައްތައް، މި މައްސަލައިގެ އިސްތިއުނާފު މަރުހަލާއިން ނިންމާ ގޮތެއް މަތިން ފެށުމަށް ހަމަޖެހިފައިވާ ކަމަށް ވެސް އީޕީއޭއިން ބުނެ އެވެ.
