ދިއްދޫ އެއާޕޯޓުގެ މަޝްރޫއުގެ އަގުތައް ހޯދަން މާލިއްޔަތު ކޮމިޓީން ފާހެއް ނުވި

ހއ. ދިއްދޫ ފަޅު ހިއްކައިގެން އެއާޕޯޓް އެޅުމުގެ މަޝްރޫއުގެ އަގުތަކާއި އެކަމާ ގުޅުން ހުރި އިތުރު ތަފްސީލުތައް ހޯދުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީގެ މިއަދު ބައްދަލުވުމަށް ހުށަހެޅުމުން، އެ މައުލޫމާތު ނުހޯދަން އެ ކޮމިޓީން ފާސްކޮށްފި އެވެ.

ވީ ކިހިނެއް؟ – އެ މަޝްރޫއާ ގުޅޭ މައުލޫމާތުތައް ހޯދުމަށް މީގެ ކުރިން ބޭއްވި މާލިއްޔަތު ކޮމިޓީގެ ބައްދަލުވުމެއްގައި ނިންމާފައިވާ ނިންމުމާ ގުޅިގެން، މިއަދު ބޭއްވި ކޮމިޓީގައި ގުޅުން ހުރި މިނިސްޓްރީތަކުން ފޮނުވާފައިވާ ޖަވާބު އިއްވާފައިވެ އެވެ.

ތަފްސީލު – ހުޅުމާލެ ދެކުނު ދާއިރާގެ އެމްޑީޕީ މެންބަރު ޑރ. އަހްމަދު ޝަމްހީދު އޭރު ހުށަހަޅުއްވާފައި އޮތީ، ކޮންޓްރެކްޓާ ފައިނޭންސިން އުސޫލުން ދިއްދޫ އެއާޕޯޓުގެ މަޝްރޫއު އެއްވެސް ކުންފުންޏަކާ ހަވާލުކޮށްފައިވޭތޯ ބެލުމަށާއި އެ މަޝްރޫއުގެ މަސައްކަތްތަކަށް އެއްބަސްވެފައިވާ އަގުތައް ސާފު ކުރުމަށެވެ. އަދި އަގު ކަނޑައެޅުމުގައި ކުރިން އެއްވެސް ކަހަލަ ދިރާސާއެއް ހަދާފައިވޭތޯ ބެލުމަށެވެ.

މިކަމާ ގުޅިގެން ހައުސިން އެންޑް ޕްލޭނިން މިނިސްޓްރީން ކޮމިޓީއަށް ފޮނުވި ޖަވާބުގައި ބުނެފައި ވަނީ:

ދިއްދޫ އެއާޕޯޓް މަޝްރޫއޫ ތަރައްގީ ކުރުމަށް އެއްވެސް ފަރާތަކާ ހަވާލުކޮށްފައި ނުވާ ކަމަށް
ނަމަވެސް އެއާޕޯޓަށް ބޭނުންވާ ބިން ހިއްކުމާއި ގޮޑުދޮށް ހިމާޔަތް ކުުރުމުގެ މަސައްކަތް މިދިޔަ އަހަރުގެ އެޕްރީލް 19ގައި އެމްޓީސީސީއާ ހަވާލުކޮށްފައިވޭ؛ އެކަމުގެ އަމަލީ މަސައްކަތް އަދި ފެށިފައި ނުވޭ
މަޝްރޫއުގެ ފީސިބިލިޓާ ސްޓަޑީވެސް ތައްޔާރުކޮށްފައި ނުވޭ

ޓްރާންސްޕޯޓް މިނިސްޓްރީން ފޮނުވި ޖަވާބުގައި ބުނެފައި ވަނީ އެ މަޝްރޫއުގެ އެއްވެސް ކަމެއް އެ މިނިސްޓްރީން ކުރިއަށް ނުގެންދާ ކަމަށެވެ.މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގެ ތެރެއިން (ފޮޓޯ/ މަޖިލިސް)

އެ ޖަވާބުތަކާ އެކު، ހަނިމާދޫ ދާއިރާގެ އެމްޑީޕީ މެންބަރު އަބްދުލްގަފޫރު މޫސާ (ގަޕޯ) ވިދާޅުވި ގޮތުގައި ދިއްދޫ އެއާޕޯޓު ތަރައްގީ ކުުރުމުގެ މަޝްރޫއު ހަވާލުކޮށްފައި ވަނީ އެމްއޭސީއެލްއާ އެވެ.

އެހެންވެ އެ މައުލޫމާތުތައް އެމްއޭސީއެލް މެދުވެރިކޮށް ހޯދުމަށް އޭނާ ހުށަހެޅުއްވި އެވެ. ޝަމްހީދު ތާއީދު ކުރެއްވި ހުށަހެޅުމަށް ކޮމިޓީގެ އަގުލަބިއްޔަތު ލިބިފައި ނުވެ އެވެ.

އެ ހުށަހެޅުމަށް ވޯޓު ލިބުނު އަދަދު ރިޔާސަތުގައި އިންނެވި ކޮމިޓީގެ މުގައްރިރު، އޭދަފުށީ ދާއިރާގެ ޕީއެންސީ މެންބަރު އަހްމަދު ސަލީމް (ރެޑްވޭވް ސަލީމް) ވިދާޅެއް ނުވެ އެވެ.މާލިއްޔަތު ކޮމިޓީގައި އެމްޑީޕީ ތަމްސީލު ކުރައްވާ ދެ މެންބަރުން: ޝަމްހީދު(ކ) އަދި ގަފޫރު

ފާހަގަކޮށްލެވޭ ކަމެއް – މީގެ ކުރިން އެމްޓީސީސީން މީޑިއާތަކާ ހިއްސާކޮށްފައިވާ މައުޅުމާތުން އެނގޭ ގޮތުގައި އެ ކުންފުންޏާ އެކު ހެދި އެއްބަސްވުމުގެ އަގަކީ، 257.21 މިލިއަން ރުފިޔާ އެވެ. ބިން ހިއްކުމުގެ އިތުރުން އެ އެއްބަސްވުމުގެ ދަށުން:

ދިއްދޫގައި 1،500 މީޓަރުގެ ރަންވޭއަކާ އެކު އެއާޕޯޓަށް ބޭނުންވާ ޕެސެންޖާ ޓާމިނަލް ތަރައްގީ ކުރުމަށް ހިމަނާފައިވޭ
ފަޔާ ބިލްޑިން އަދި އެޑްމިން އޮފީސްވެސް ގާއިމްކޮށް، ފަޔާ ޕޮންޑް އާއި އެއާފީލްޑް ލައިޓިން ސިސްޓަމް ހަރުކުރާނެ ކަމަށް އޭރު އެމްޓީސީސީން ބުނި

މަޝްރޫއުގެ އަމަލީ މަސައްކަތް އަދި ނުފެށޭ ކަމަށް އެމްޓީސީސީން ބުނެފައިވާ އިރު، މިދިޔަ ޖެނުއަރީ މަހު ދިއްދުއަށް ރައީސް މުހައްމަދު މުއުއިއްޒު ކުރެއްވި ދަތުރުފުޅުގައި އެމަނިކުފާނު ވަނީ، ދެން އެރަށަށް ވަޑައިގަންނަވާނީ އެ ރަށު އެއާޕޯޓަށް ޖައްސާ ފްލައިޓުން ކަމަށް ވިދާޅުވެފަ އެވެ.

އެ ރަށު ފަޅު ހިއްކައިގެން އެއާޕޯޓު ތަރައްގީ ކުރައްވާނެ ކަމަށް ރައީސް މުއިއްޒު ވައުދުވެވަޑައިގެންނެވީ ރިޔާސީ ކެމްޕެއިންގަ އެވެ.