ފެނަކަ ދިއްދޫ މުވައްޒަފުންތަކެއްގެ އެއްބަސްވުން ހަމަވުމުން ދޫކޮށްލުމުން އިހުތިޖާޖު ކުރަނީ
ހއ. ދިއްދޫ ފެނަކަ ބްރާންޗުގައި ކޮންޓްރެކްޓު މުވައްޒަފުންގެ ގޮތުގައި ތިބި ބައެއްގެ އެއްބަސްވުން މިއަދަށް ހަމަވުމުން އެ މީހުން ދޫކޮށްލުމުން، އިހުތިޖާޖު ކުރަން ފަށައިފި އެވެ. ފެނަކައިން ބުނަނީ އެ ތަނުގައި ވަޒީފާ އަދާކުރަމުން ދިޔަ ދާއިމީ އެއްވެސް މުވައްޒަފަކު ވަކިކޮށްފައި ނުވާނެ ކަމަށެވެ.
ވީ ކިހިނެއް؟ – ވަޒީފާއިން ވަކިކުރި ކަމަށް ބުނެ ދިއްދޫ ފެނަކަ ބްރާންޗުގެ މުވައްޒަފުންތަކެއް ދަނީ އިހުތިޖާޖު ކުރަމުންނެވެ.
ތަފްސީލް – އެކަމާ ގުޅޭ ގޮތުން ސުވާލުކުރުމުން ފެނަކައިގެ ޗީފް ހިއުމަން ރިސޯސް އޮފިސަރު ހުސައިން ހަސަންފުޅު މިއަދު ‘ދައުރު’އަށް ވިދާޅުވީ އެ ކުންފުނީގެ ދާއިމީ އެއްވެސް މުވައްޒަފަކު ވަޒީފާއިން ވަކިކޮށްފައި ނުވާނެ ކަމަށެވެ.
އޭނާ ވިދާޅުވި ގޮތުގައި ދިއްދޫގެ އިންޖީނުގެ އެޅުމުގެ މަސައްކަތަށް ނަގާފައި ތިބި ކޮންޓްރެކްޓު މުވައްޒަފުންގެ އެއްބަސްވުމުގެ މުއްދަތު މިއަދަށް ހަމަވުމުން، އެ މީހުންގެ އެއްބަސްވުން އާނުކުރަން އޮތީ ނިންމާފަ އެވެ. އެގޮތުން އޭނާ ވިދާޅުވީ:
- 70 މީހުން ކޮންޓްރެކްޓު މުވައްޒަފުުންގެ ގޮތުގައި އެ މަޝްރޫއަށް ނެގި
- މި ވަގުތު އެ މަޝްރޫއު އޮތީ ހުއްޓިފައި
- ކުންފުނީގެ މާލީ ހާލަތު އޮތް ގޮތުން، އެ މުވައްޒަފުންނަށް މަސައްކަތެއް ނެތި މުސާރަ ދެވޭކަށް ނެތް
- ޕްރޮޮޖެކްޓު ކުރިއަށް ގެންދަން ވެސް މާލީ ހާލަތު މިވަގުތު ތަނެއް ނުދޭ
“ފާއިތުވި ތިން މަހު އެ މުވައްޒަފުން ތިބީ މަސައްކަތެއް ނެތި. ނަމަވެސް ކުންފުނީގެ ފައިސާ އިން އެ މީހުންނަށް މުސާރަ ދެމުންދިޔަ،” ހުސައިން ވިދާޅުވި އެވެ.
“މިއަދު ކޮންޓްރެކްޓު ހަމަވެގެން 57 މުވައްޒަފެއްގެ ވަޒީފާގެ މުއްދަތު ހަމަވީ.”
ދިއްދޫ އިންޖީނުގެ މަޝްރޫއު:
- މުވައްޒަފުންނަށް ހިނގާފައިވާ ޖުމްލަ ހަރަދު: 23.2 މިލިއަން ރުފިޔާ
- މަޝްރޫއަށް ބޭނުންވާ ތަކެތި ހޯދުމަށް: 19 މިލިއަން ރުފިޔާ
- ޕެޓީ ކޭޝްގެ ގޮތުގައި: 428،473ރ.
- މިހާތަނަށް ހިނގާފައިވާ ޖުމްލަ ހަރަދު: 49 މިލިއަން ރުފިޔާ
ގުޅުން ހުރި ކަމެއް – ފެނަކައިން މަޝްރޫއުތައް ހިންގާ ރަށްރަށުގެ ތެރެއިން މިހާރު އެއްވެސް މަސައްކަތެއް ނެތް ކޮންޓްރެކްޓް މުވައްޒަފުންގެ އެއްބަސްވުން އާނުކުރަން އެ ކުންފުނިން ވަނީ ނިންމައިފަ އެވެ.
ކުރީ ސަރުކާރުގައި ކޮންޓްރެކްޓް މުވައްޒަފުންގެ ގޮތުގައި ފެނަކައަށް ނަގާފައި ތިބި ބައެއް މުވައްޒަފުންގެ އެއްބަސްވުމުގެ މުއްދަތު ހަމަވުމުން ކޮންޓްރެކްޓް އާނުކުރަނީ ކުންފުނީގެ ހާލަތު މިވަގުތު އޮތް ގޮތުން މަޖުބޫރުވެގެން ކަމަށާއި ކިރިޔާވެސް ބެހެއްޓެން ހުރި މުވައްޒަފަކު ވިއްޔާ ބަހައްޓަން އިރުޝާދު ދީފައިވާނެ ކަމަށް ރައީސް މުހައްމަދު މުއިއްޒު ވެސް ވަނީ ވިދާޅުވެފަ އެވެ.
